Үстіміздегі жылдың 5 мамыры күні өтуі тиіс болған Головкин мен Альварес арасындағы сұрапыл бокс кеші 15 қыркүйек күні өтуі мүмкін.
Бұл жайында ESPN телеарнасының журналистері айтты. Танымал журналист Дэн Рафаэль: «Бұл кездесудің өтетіні анық. Тура былтырғыдай T-Mobile Arena кешенінде болады», деді. Ал одан кейін оның әріптесі Брайан Кэмпбелл «Кездесу Мексиканың тәуелсіздігі күніне орайластырып, 15 қыркүйекте өтеді», деп қостап өтті.
Айта кетейік, қос боксшы өткен жылы 15 қыркүйекте кездесіп, төрешілердің шешімімен тең тарқасқан болатын.
Месси «Алтын бутсы» иегері
«Барселонаның» шабуылшысы Лионель Месси 2017-2018 жылғы маусымның «Алтын бутсысын» иеленді. Аргентиналық ойыншы биыл Испан Ла-лигасында 34 гол соғып, 68 ұпай жинады.
Негізгі бәсекелесі мысырлық Мұхамед Салах 64 ұпаймен екінші орында. «Ливерпуль» шабуылшысы Ағылшын премьер-лигасында 32 гол соқты.
Месси өзінің спорттық ғұмырында «Алтын бутсыды» 5-рет алып отыр. Бұл әлем футболындағы жаңа рекорд. Ал «Реал» ойыншысы Криштиану Роналду бұл марапатты 4-рет ұтқан еді.
Лопес 2-орынды иемденді
Атақты Дзонколан асуында көрсеткен нәтижелерінен кейін «Астана» командасының капитаны Мигель Анхель Лопес тағы да көзге түсті.
«Джиро д’Италия» веложарысының 15-кезеңінде Лопес жүлделі 2-орынды иемденді. «Астана» капитаны финишке жалпы есептің фавориттерінен құралған шағын топпен бірге, қызғылт жейде иегері Саймон Йейтстен 41 секунд уақыттан кейін келіп, спринтте жеңімпаз атанды. Сонымен қатар 15-кезеңнің нәтижесі бойынша Мигель Анхель үздік жас шабандоздың ақ жейдесін сақтап қалды.
